Perqué estudiar a l’UT2J ?

Una universitat dins l’istòria

L’universitat de Tolosa foguèt fondada en 1229 segon las clausas del tractat de Meaux jol govèrn de l’Inquisicion per assegurar lo contraròtle de las tèrras de Tolosa per la Glèisa e los Franceses. L’universitat de Tolosa representava l’ortodoxia religiosa e sa sola lenga foguèt longtemps lo latin. Dins lo sègle XVI, l’universitat venguda prestigiosa aculhiguèt un cèrt nombre de pensaires umanistas coma Rabelais, Michel Servet, Etienne Dolet, Michel de l’Hospital e Miquèl de Montanha (« Montaigne »).

En 1808, l’institucion, suprimida pendent la Revolucion, venguèt Universitat imperiala e reüniguèt las Facultats de Teologia catolica e protestanta, la facultat de las Umanitats, la Facultat de Drech, la de Sciéncias e mai una escòla de Medecina.

Latinofòna puèi francofòna, l’universitat de Tolosa venguèt pas luòc d’estudi e de practica de la lenga occitana qu’a la fin del sègle XIX amb la creacion de la cadièira d’estudis “provençals” (dins lo sens de l’epòca, es a dire “occitans”) tenguda primièr per Alfred Jeanroy puèi, en 1910, per Josèp Anglada.

Al sègle 20, en 1968, la Facultat de Letras foguèt transferida del centre de Tolosa al luòc on es ara, lo quartièr del Miralh, flame nòu dins aquel temps, que donèt son nom a l’Universitat de Tolosa 2-lo Miralh.


"París per veser
Lion per aver
Bordèu per despendre
E Toulouse per aprendre"
(Reprovèrbi censat de la Renaissença)

Una Universitat d’auçada mondiala

La dobertura internacionala es sempre estada una de las prioritats màgers de l’UTM.

Nòstra institucion a passat 200 convencions de programas d’escambi amb d’universitats del mond entièr, 378 convencions al dintre d’Euròpa pel biais del programa E.R.A.S.M.U.S. e compta unes 4.000 estudiants internacionals de 150 nacionalitats differentas dins sos efectius.

L’UTM desenvolopa en particular sos partenariats amb l’America latina e lo mond francofòn.

Per una lista de las nòstras universitats partenàrias, mercé de de visitar la seccion « Còoperacion Europèa e Internacionala » del nòstre sit web.

Los campus de l’UTM a l’estrangièr :

  • Malaisia
  • Espanha
  • Vietnam

Una vida estudianta que rebofa d’activitats


L’UTM manten una tradicion d’excelléncia academica e prepausa a l’encòp un dels campus mai actius de França. L’Universitat ofrís als estudiants mantuna activitat fòracursus :

Lo Centre d’Iniciativas Artisticas del Miralh (CIAM) organiza cada an a pr’aquí 120 eveniments artistics e culturals a res-non-còst en associacion amb d’artistas e de professionals de las arts. Ofrís tanben mantun obrador pels estudiants e mai de classas de poesia, d’escritura, de practica orala publica, de critica e d’autras encara. Lo Centre es albergat dins La Fabrique (La Fabrica), un bastiment de 3,000 m² inaugurat en 2009, qu’es lo mai grand centre universitari en Euròpa totalament avodat a l’Art e la Cultura.


Lo departament dels Espòrts (Servici universitari d’activitats fisicas e esportivas, SUAPS) prepausa de practicar 40 espòrts diferents a totes los nivèls. Los espòrts se pòdon practicar pel simple léser e plaser, o se pòdon integrar dins lo cursus de l’estudiant e apondre una preciosa competéncia esportiva a son diplòma.


L’Universitat albèrga tanben mai de 45 associacions estudiantas sens tòca lucrativa, investidas dins una granda varietat de domenis. Demest aquelas associacions se comptan mai de 10 centres gerits pels estudiants, 9 associacions de teatre que montan de pèças dins divèrsas lengas, e una associacion completament avodada als estudiants estrangièrs (Erasmus International Mirail Association).

Un sosten de tria

L’UTM es renomenada per la qualitat dels conselhs e del tutoratge dels estudiants despuèi sa primièira annada a l’universitat fins la jorn qu’obtenon son diplòma.

Los estudiants a l’UTM aprofièchan un taus de succès excepcional, que sarra los 100% a totes los nivèls. En 2011, lo taus de succès a l’Universitat anava de 89% pels estudiants de licéncia fins a 99% pels estudiants de master professional.


De prestacions qualitadosas

Nòstre campus principal assòcia d’instruments educatius de qualitat amb las pus recentas tecnologias:

Cada estudiant e ensenhaire sul campus a accès a un Espaci numeric de trabalh personal en linha (ENT) que lor provesís de ressorsas numericas e de servicis administratius.

La Bibliotèca universitària centrala (BUC) porgís als estudiants e als cercaires mai de 400,000 documents, e es completada per 17 bibliotècas especializadas de departament e de centres de ressorsas sul campus.

La Librariá Universitària (Librairie Études) prepausa al estudiants, als ensenhaires e personals de l’universitat unes 15,000 libres nòus o de segonda man.

La Direccion de l'orientacion dels estagis e de l'inseriment (DOSI) provesís als estudiants de conselhs per sa professionalizacion. Los conselhièrs ajudan los estudiants a trobar d’informacions suls corses, a causir la disciplina majora que melhor li conven, a trobar d’estagis e a bastir un projècte professional fondat sus sos interèsses e sas capacitats. La DOSI ajuda tanben los estudiants a desenvolopar de malhums d’ancians estudiants, de ligams amb las autras universitats e de contactes professionals. La DOSI organiza d’obradors d’escritura de CV e tota mena de conferéncias suls mestièrs e l’emplec tot lo long de l’an.

Lo Servici Interuniversitari de Medecina Preventiva e de Promocion de la Santat (SIMPPS) provesís als estudiants una assisténcia medicala e sociala. De mètges, d’infirmièiras, de psicològas, de trabalhaires socials e d’autres especialistas medicals prenon suènh de la santat e del benestar dels estudiants de l’UTM per tal que sián dins las melhoras condicions per capitar sos estudis.

L’UTM dispausa d’un Servici d’Ensenhament a Distància (SED) dels mai avançats en França, que provesiguèt mai de 500 corses a 3,300 estudiants en 2012.

Las Premsas Universitàrias del Miralh (PUM) son lo cinquen editor universitari en França e publican de recercas en Literatura, Lengas e Umanitats.

Lo Restaurant universitari (RU) ofrís una larga causida de repaisses als estudiants per un prètz rasonable, e servís environ 2,700 repaisses per jorn.


Una institucion de recerca de primièr reng

Amb un budget de recerca de mai de 4 milions d’èuros e mai de 900 cercaires, l’UTM es una de pirmièr reng dins de nombrosas disciplinas.

Dins nòstra Universitat lo estudis doctorals son organizats en 3 Escòlas doctoralas 

  • CLESCO : Comportament, Lengatge, Educacion, Socializacion, Cognicion
  • ALLPHA@ : Arts, Literaturas, Lengas estrangièiras modèrnas, Filosofia, Estudis en Informacion e Communicacion
  • TESC : Temps, Espaci, Societats, Culturas


UTM es partenari de 4 autras escòlas doctoralas

  • MITT : Matematicas, Informatica e Telecomunicacions a Tolosa
  • EDSYSS : Escòla Doctorala d’Engenhairia dels Sistèmas
  • AA : Aeronautica, Astronautica
  • GEET : Engeni Electric, Electronica e Telecomunicacions


Aquelas sèt escòlas doctoralas son apiejadas sus mai de 20 laboratòris de recerca que cobrisson una granda diversitat de camps de recerca.

 

Tolosa – Segonda vila universitària de França

Tolosa, capitala de Miègjorn-Pirenèus, es renomenada per sa vida estudiantina e son atmosfèra de bon viure.

Es classada primièira vila de França per la vida estudianta.

L’aeropòrt de Tolosa o fa aisit de rejónher la vila a partir de totes los païses d’Euròpa e contribuís a son identitat internacionala e multiculturala.

Tolosa gausís d’una localizacion excepcionala a un parelh de centenats de quilomètres de dels Pirenèus, de la Mediteranèa e de l’Ocean Atlantic.


Donadas-claus

  • 4a vila de França per la populacion
  • 2a vila universitària
  • 1 milion d’estatjants
  • 90,000 estudiants
  • 2,000 oras de solelh per an
  • 1a vila europèa per l’aeronautica, la 2a dins lo mond
  • 1a vila europèa per las tecnologia aeroespacialas